د هرات ځایي چارواکي وایي، چې په دغه ولايت کې له ايرانه پر راستنو شويو ۵ زره کورنيو د چمتو شويو خوراکي توکو د وېش لړۍ دويم پړاو پیل شوی دی. د سرچینې په خبره دغه ډول مرستې د ملک سلمان بنسټ په مالي ملاتړ او د توحيد مؤسسې په تخنيکي همکارۍ د هېواد په ۳۴ ولايتونو کې پلي کېږي، چې په ترڅ کې به يې پر ۶۰ زره اړمنو او راستنو شويو کورنيو خوراکي توکي ووېشل شي. د دې لړۍ لومړی پړاو څو ورځې وړاندې په تورخم کې له پاکستان څخه پر راستنو شويو کورنيو د ۱۰۰۰کڅوړ په وېش سره پيل شوی وو. په دې کڅوړو کې اوړه، وريژې، بوره، غوړي او لوبيا شامل دي، چې هرې کورنۍ ته ورکول کيږي.
