په هرات ولایت کې د پارسوا د درملو د تولید کار خونې مسوولینو خبر ورکړی، چې یاده کارخونه په ورځني ډول ۳۰ زره بوتله سېرمونه تولیدوي. د پارسوا د درملو فابریکې رئیس محمد رضا عالمي رسنیو ته ویلي چې دغه کارخونه په ورځني ډول د ۳۰ زره بوتله سېرمونو د تولید وړتیا لري او د هېواد ۲۰ سلنه اړتیا پوره کوي. نوموړي زیاته کړې چې دغه کارخونه اوس مهال څه باندې ۳۰ ډوله درمل تولیدوي او ډېرژر به شاوخوا ۱۰ قلمه نور درمل هم بازار ته وړاندې کړي. نوموړی زیاتوي چې پر یاده کار خونه یې تراوسه څه باندې یو میلیون۲۵۰ زره ډالر پانګونه کړې ده. ورته مهال د هرات د درمل پلورونکو د ټولنې مشر محمد ناصر امین ویلي، چې د پارسوا کارخونې ترڅنګ په یاد ولایت کې۱۲ نورې کارخونې هم درمل تولیدوي.
