د یمن-اسرائیلو بریدونه/ریالی/غندنه
ای ډي: 8397930
نېټه: د اکتوبر 4، 2024
ځای: یمن
موده: یوه دقیقه او اودیرش ثانیې
سرچینه: (CGTN)
محدودیتونه: د چینايي وګړو لپاره نه ده
خپور شوی: 2024-10-05 04:52
وروستی سمون: 2024-10-05 04:56
بشپړ خبر
په زرګونو یمني وګړو د پلازمینې صنعا په السبین څلورلارې کې د حزب الله د مشر حسن نصرالله د وژل کېدو او په لبنان او غزې دواړو باندې د تازه بمباریو په پار لاریونونه کړي دي.
دوی د یمن په بندري ښار حدیده باندې د اسراییلو له بریدونو سره له غزې او لبنان سره د پراخ ملاتړ ټینګار وکړ.
یوه ګډونوال عبدالسلام عیاد وویل، چې موږ په غزه، لبنان، سوریه، عراق او یمن کې د اسراییلو د بریدونو، جنایتونو او قتل عام د غندلو لپاره راوتلي یو.
د محمد الحمزي په نامه یوه بل کس وویل، موږ نن د حسن نصرالله د وژنې په اعتراض کې راوتلي یو، چې د عربي، اسلامي او انساني موخو لپاره شهید ګڼل کېږي.
د نصرالله تر وژلو وروسته حوثي یاغیانو اعلان وکړ چې دوی پر اسرائیلو د پنځو بې پیلوټه الوتکو او توغندیو بریدونه کړي دي. د دوی د پوځ ویاند ویلي چې دغو بریدونو په تل ابیب، ایلات او بن ګوریون نړیوال هوايي ډګر کې پوځي ځایونه په نښه کړي چې د اسرائیلو یو له مهمو هوايي ډګرونو څخه ګڼل کیږي.
د راپورونو پر اساس ویل کیږي چې حوثیانو د یوې اونۍ په اوږدو کې د اتو بالستیک توغندیو او یوې کښتۍ سره د برېټانیا د تیلو دوه کښتۍ په نښه کړې دي. دغه راز د حوثیانو مشر پر اسراییلو د ایران د برید ملاتړ کړی او ادعا یې کړې چې دا برید د امریکا د دفاع او د اسراییلو د دفاعي سیستمونو په تېریدو بریالی شوي دي.
له دې سره هممهاله اسراییلو د یکشنبې په ورځ په یمن کې د حدیده او راس عیسی په ګډون د حوثي یاغیانو تر کنټرول لاندې بندرونو باندې هوايي بریدونه وکړل، چې ملکي تلفاتو او زیربناوو ته د زیان رسولو لامل شول.
په صنعا کې روغتیايي چارواکو ویلي چې د بریدونو په پایله کې لږ تر لږه څلور کسان وژل شوي او شاوخوا ۳۰ نور ټپیان دي یمني چارواکو د مړو او ژوبلو پخلی کړی او ویلي یې چې بریدونه به بشري وضعیت نور هم خراب کړي.
د اسراییلو بریدونو په حدیده کې ملکي تاسیساتو ته هم سخت زیان اړولی، په ځانګړي ډول د بریښنا سټیشن ته جدي زیان اوښتی.
سیمه ییزو چارواکو اندیښنه ښودلې او د نړیوال بشردوستانه قانون سره سم یې د ملکي ځایونو د ساتنې غوښتنه کړې.
دغه لاریونونه له یوه کال راهیسې په ۷۰ احتجاجي سیمو کې روان دي. د یمن پر بریدونو سربېره، ګډونوالو وویل چې لاریونونه د متحده ایالاتو او اسراییلو سره د هر ډول احتمالي مقابلې لپاره چمتو کولو په وخت کې د عامه تحرک او استخدام ملاتړ کوي.
دا په داسې حال کې ده چې د سپټمبر په ۲۷ مه د بیروت په جنوبي څنډه باندې د اسرائیلو په هوايي بریدونو کې د حزب الله مشر سید حسن نصرالله او د دې ډلې څو مهم غړي ووژل شول.
د نصرالله له مړینې وروسته د اسراییلو او لبنان ترمنځ حالات ترینګلي شوي دي.
