عراق-امریکا/د ماموریت پای
ایډي: 8396935
نېټه: د سپتمبر 28، 2024 / فایل
ځای: عراق متحده ایالات
موده: یوه دقیقه او لس ثانیې
سرچینه: (CCTV)
محدودیتونه: د چینايي وګړو لپاره نه ده
خپور شوی: 28-09-2024 05:00
وروستی سمون: 2024-09-28 05:04
بېجینګ، چین – د سپتمبر 28، 2024 (CCTV)
بشپړ خبر
د متحده ایالاتو او عراق حکومتونو د جمعې په ورځ په یوه ګډه خپره شوې اعلامیه کې ویلي، چې په عراق کې د اسلامي دولت سخت دريځې ډلې پرضد د امریکا په مشرۍ ایتلافي پوځي ماموریت چې یوه لسیزه وړاندې رامنځته شوی و د راتلونکي ۲۰۲۵م کال تر سپټمبر میاشتې به پای ته ورسېږي.
په یاده اعلامیه کې چې د متحده ایالاتو د بهرنیو چارو وزارت په ویب پاڼه خپره شوې پکې ویل شوي، چې د اسلامي دولت سخت دريځې ډلې پرضد به دوه اړخیزو امنیتي همکاریو ته په داسې طریقه وده ورکوي چې هم د عراقي ځواکونو ملاتړ وکړي او هم پر داعش خپل فشار جاري وساتي.
په خبرپاڼه کې راغلي چې د عراق او امریکا لوړپوړي پوځي کمیسیون چې د دواړو هېوادونو له استازو څخه جوړ شوی دی، داسې پلانونه جوړوي چې د انتقالي دورې په جریان کې په عراق کې د موجودو ایتلافي سلاکارانو د خوندیتوب لپاره اړین اقدامات وکړي.
په اعلاميه کې دا هم ويل شوي چې په ګاونډ سوریه کې د ایتلاف پوځي ماموریت چېرته چې داعش فعاله ده، د ۲۰۲۶ کال تر سپټمبر میاشتې پورې به دوام وکړي.
په بیان کې په دې اړه ډېر لږ معلومات ورکړل شوي چې د ماموریت پای ته رسېدو په پایله کې به څومره امریکایي سرتېري له عراق څخه ووځي.
په ورته مهال یوه جګپوړي امریکايي چارواکي د جمعې په ورځ د یوې خبري غونډې پر مهال د خبریالانو سره په خبرو کې وویل: زه یوازې غواړم دومره ووایم چې دا وتل نه بلکې دا د ځواکونو لېږد دی. دا د ایتلافي پوځي ماموریت څخه د متحده ایالاتو او عراق دوه اړخیزو امنیتي اړیکو پراخېدو ته یو لېږد دی.
د یادونې وړ ده چې متحده ایالات اوس مهال په عراق کې شاوخوا ۲۵۰۰ پوځي پرسونل او په سوریه کې شاوخوا ۹۰۰ سرتېري لري. د دوی دنده د داعش وسله والو سره مبارزه او همدارنګه د محلي امنیتي ځواکونو روزنه او مشوره ورکول دي.
