د افغانستان او کینیا ترمنځ د سوداګریزو اړیکو د پراختیا، پانګونې او په بېلابېلو اقتصادي برخو کې د ګډو همکاریو پر پیاوړتیا خبرې شوې دي. د صنعت او سوداګرۍ وزیر نورالدین عزیزي د تانزانیا د پانګونې کنفرانس په څنډه کې د کینیا د کانونو له وزیر حسنعلي جوه سره لیدلي او د دواړو هېوادونو ترمنځ یې د اقتصادي همکاریو پر پراختیا بحث کړی دی. د صنعت او سوداګرۍ وزارت د معلوماتو له مخې، عزیزي په دې کتنه کې د سوداګریزو راکړو ورکړو پر زیاتوالي او له کینیا څخه د چای، قهوې او نورو تولیداتو پر واردولو ټینګار کړی او د کانونو، کرنې او صنعت په برخو کې یې د ګډو پانګونو او د دواړو هېوادونو بازارونو ته د کورنیو تولیداتو د لاسرسي غوښتنه کړې ده. د کینیا د کانونو وزیر هم د اقتصادي همکاریو د پراختیا هرکلی کړی او د خپل هېواد لپاره یې د افغانستان بازار مهم بللی دی. دواړو لورو همدارنګه د ګډو نندارتونونو پر جوړولو او د همکاریو د عملي کولو لپاره د یوې ګډې کاري ډلې د رامنځته کولو په اړه د هوکړهلیک پر چمتو کولو او لاسلیک موافقه کړې ده. ټاکل شوې د دغه هوکړهلیک مسوده د کینیا له لوري چمتو او له افغان لوري سره شریکه شي.








