د صنعت او سوداګرۍ وزارت وايي، د دغه وزارت سرپرست نورالدین عزیزي د افغانستان لپاره د بریتانیا له ځانګړي استازي ریچارد لیندزي سره په انلاین ناسته کې د افغانستان د اوسني حکومت د فعالیتونو، اقتصادي اړیکو د پراختیا او له نړیوالې ټولنې سره د تعامل په اړه خبرې کړې دي. د وزارت د خبرپاڼې له مخې، لیندزي له نړۍ سره د افغانستان د رغنده تعامل هرکلی کړی او د افغانستان لپاره یې د بریتانیا د بشري مرستو په اړه معلومات ورکړي دي. د بریتانیا ځانګړي استازي ویلي، هېواد یې په پام کې لري چې له افغانستان سره د همکاریو مسیر په تدریجي ډول له بشري مرستو څخه اقتصادي همکاریو ته واړوي. نوموړي همداراز د افغانستان او بریتانیا د اړیکو د پیاوړتیا ملاتړ کړی او ویلي یې دي چې هېواد یې د مخ پر ودې هېوادونو سره د اړیکو د پراختیا په خپلو پروګرامونو کې افغانستان ته هم پام لري.
