په فراه کې د افغان او ایراني سوداګرو ترمنځ د سیمنټو په برخه کې د پنځه میلیونه امریکايي ډالرو په ارزښت پنځه هوکړهلیکونه لاسلیک شوي دي. د هوکړهلیکونو د لاسلیک په مراسمو کې د فراه والي ملا محمد حافظ مجاهد، د ایران د جنوبي خراسان والي سید محمدرضا هاشمي، د دواړو هېوادونو یو شمېر ډیپلوماتیکو استازو، سوداګرو او د صنعت او سوداګرۍ مسوولینو ګډون کړی و. د فراه والي ویلي، د ورته ناستو جوړول او د سوداګریزو هوکړهلیکونو لاسلیکول د سوداګرۍ، ترانزیټ، ټرانشیپ او د دواړو هېوادونو د اړیکو د پراختیا لپاره مهم دي. نوموړي د بازارچې له لارې د موټرو د تګ راتګ د زیاتېدو او سوداګرو ته د لا ډېرو اسانتیاوو د برابرولو غوښتنه هم کړې ده.
