د اوزبکستان د اوسپنې پټلۍ مسوولینو ویلي، د روان کال په لومړیو پنځو میاشتو کې د افغانستان او اوزبکستان ترمنځ د اوسپنې پټلۍ له لارې له ۴۱ زرو ډېر واګونونه لېږدول شوي، چې د تېر کال د همدې مودې په پرتله نږدې دوه برابره زیاتوالی ښيي. د راپور له مخې، په دغو واګونونو کې څه باندې ۲.۷ میلیونه ټنه توکي لېږدول شوي دي، په داسې حال کې چې د تېر کال په ورته موده کې ۲۰ زره او ۴۱۵ واګونونه لېږدول شوي وو. د اوزبیکستان د سرخاندریا د وسپنې پټلۍ ادارې مرستیال شهرت قادروف ویلي، د روان کال په لومړیو پنځو میاشتو کې د واګونونو شمېر له شاوخوا ۲۰ زرو څخه تر ۴۰ زرو او ۴۱ زرو پورې لوړ شوی دی.
