د ټولګټو وزارت د رسنیز دفتر د مالوماتو له مخې د څه باندې ۶۴۱ میلیونه افغانیو په ارزښت، د سمنګان ولایت د ایبک – رویدوآب سړک د اساسي رغولو تړون د ټولګټو وزارت او دوو ساختماني او سړک جوړونې شرکتونو ترمنځ لاسلیک شوی دی. سرچینې ویلي، د یاد سړک د اساسي رغونې قرارداد، چې ۲۰ کیلومتره اوږدوالی لري، د «ډیزاین بلډ» په بڼه د ۶۴۱ میلیونه او ۶۷۰ زره افغانیو په ارزښت د ګډ مشارکت له لارې لاسلیک شوی دی. یاد سړک د سمنګان له مرکز ایبک ښار څخه پیلېږي او د همدې ولایت تر رویدوآب ولسوالۍ پورې غځېږي. ټاکل شوې ده چې د دغه سړک د اساسي رغولو چارې په دوو کلونو کې بشپړې شي او له بشپړېدو وروسته به د عامو خلکو د استفادې لپاره پرانېستل شي.
