د ماشومانو د خوندیتوب بنسټ (ایس ټي سي) پر خپله اېکس پاڼه خبر ورکړی چې په افغانستان کې د وروستیو پراخو سېلابونو له کبله د ماشومانو په ګډون څه په باندې ۱۰۰ کسانو ژوند بایللی دی. یاد بنسټ زیاته کړې چې سېلابونه ناڅاپي راځي او کولی شي د ماشومانو ژوند په څو ثانیو کې «له منځه یوسي». د ماشومانو د خوندیتوب بنسټ خبرداری ورکړی، چې په افغانستان کې د نورو ورښتونو اټکل هم کېږي او د ماشومانو د ژغورلو لپاره بېړنۍ مرستې اړینې دي. دا په داسې حال کې ده چې په هېواد کې د وروستیو سېلابونو له کبله د ځاني زیان ترڅنګ ګڼ مالي تاوانونه هم اوښتي دي.
