د افغاني سرې میاشتې ټولنې خبر ورکړی، چې په بلخ کې یې له ګاونډیو هېوادونو ۱۰۰۰ راستنو شویو کورنیو سره د خوراکي او غېرخوراکي توکو مرسته کړې ده. سرې میاشتې په خپره کړې خبر پاڼه کې ویلي، چې هرې کورنۍ ته ۱۰ قلمه خوراکي توکي ورکړل شوي، چې د هرې کورنۍ د مرستې مجموعي وزن ۱۰۴ کیلوګرامه کېږي. د سرچینې په خبره په دې مرستو کې د خوراکي توکو تر څنګ ماشومانو او ښځو ته ژمنۍ جامې او نور اړین توکي هم وېشل شوي دي. دا مرستې داسې مهال کېږي چې د رسمي شمېرو لهمخې، په تېر یوه کال کې له ۲مېلیونو څخه ډېر افغان کډوال له پاکستان او ایران څخه په جبري توګه ستانه کړای شوي او دا لړۍ لا هم روانه ده.
