د ننګرهار ولایت د کرنې ریاست مسوولین وایي، چې د تورخم بندر مسوولینو له پاکستان څخه افغانستان ته د ۳۵ مټریکه ټنه بې کیفیته کچالو د واردېدو مخنیوی کړی دی. د یاد ریاست رسنیز دفتر خبر ورکړی، چې دغه ۳۵ مټریک ټنه بې کیفیته کچالو د نباتي قرنطین مدیریت مسوولینو له لوري د دقیقې معاینې وروسته بېرته پاکستان ته ورګرځولي دي. د ننګرهار د کرنې ریاست له ټولو سوداګرو غوښتي چې هېواد ته باکیفیته او معیاري محصولات وارد کړي، څو افغانان له صحي او خوندي خوراکي توکو ګټه واخلي. د یادونې وړ ده، چې له دې مخکې هم د ننګرهار کرنې ریاست کارکوونکو له پاکستان څخه واردېدونکي بېکیفیته محصولات تشخیص او بېرته پاکستان ته ورګرځولي دي.
