د ټسلا او سپېس اېکس شرکتونو مشر اېلن ماسک د خپل نوي سیاسي ګوند “امریکا ګوند” د جوړېدو اعلان وکړ. دغه اعلان وروسته له هغه وشو، چې ماسک له خپلو پلویانو څخه د نوي ګوند د جوړېدو په اړه نظر واخیست او د خلکو پراخ ملاتړ یې ترلاسه کړ. اېلن ماسک په خپل تازه ټویټ کې اعلان وکړ، چې د «امریکا ګوند جوړ شو». دا اعلان د ولسمشر ډونالډ ټرمپ د مالیې کمولو او لګښتونو د قانون د لاسلیک وروسته وشو، چې ماسک په کلکه د دې قانون مخالف و. ماسک مخکې ویلي و، چې هغه به یو نوی سیاسي ګوند پیل کړي او د هغو قانون جوړونکو پر وړاندې به مبارزه وکړي چې د دې لایحې ملاتړ کوي.
