د کډوالو او راستنېدونکو چارو وزارت ویلي، چې له ایران څخه په تېرو ۲ ورځو کې څه باندې ۵زره ۳سوه او له پاکستان څخه پرون ۴۸۱ افغان کډوال بېرته هیواد ته را ستانه شوي دي. د کډوالو او راستنېدونکو چارو وزارت مسوولین وایي، چې یاد شمېر کسانو کې کورنۍ هم شاملې وې او ۶۲ تنه یې اړمن پېژندل شوې، چې د مرستو په موخه د کډوالۍ نړیوال سازمان دفتر ته ور پېژندل شوي دي. د معلوماتو له مخې، له راستنو شویو ۲۵۸ کورنیو سره د سرپرست حکومت له لوري لس لس زره افغانۍ مرسته هم شوې او دغه راز ۵۳ بې سرپرسته ماشومان د خپلو کورنیو د پېژندنې په موخه وارچايلډ موسسې ته ور پېژندل شوې دي.