د افغاني سرې میاشتې ټولنې په خپله اېکس پاڼه خبر ورکړی، چې په لغمان کې یې د اورلګېدنې له امله له زیانمنه شوې کورنۍ او په پکتیا ولایت کې یې له ۱۲ تثبیت شویو سوالګرو کورنیو سره مرسته کړې ده. د مالوماتو له مخې په دې مرستو کې یې د لغمان ولایت مرکز مهترلام اړوند په هرمل سیمه کې هغه کورنۍ چې د اورلګېدنې له امله زیانمنه شوې وه، د افغاني سرې میاشتې له لوري ورسره د یوې خېمې، ۶ کمپلو، د پخلنځي ١ سیټ، ۲ ترپالونو او ۲ د اوبو بوشکو ترڅنګ ۱۵،۰۰۰ افغانۍ نغدي مرسته شوې ده. دغه راز په یو بل خبر کې یې ویلي، چې په پکتیا ولایت کې یې له ۱۲ تثبیت شویو سوالګرو کورنیو هرې یوې سره د ۵ زره افغانیو نغدي مرسته کړې ده.
