د کرنې، اوبو لګولو او مالدارۍ وزارت له لوري په هېواد کې د نیالګيو اېښودلو ملي کمپاین نن د سرپرست حکومت د یو شمېر پوړو چارواکو په شتون کې پیل شو. د کرنې، اوبو لګولو او مالدارۍ سرپرست وزیر د یاد کمپاین د پیل په مراسمو کې وویل چې د هېواد د سمسورتیا په موخه يې د سرپرست حکومت له بیا واکمنۍ وروسته تر اوسه پورې د هېواد په کچه ۸۲ میلیونه نیالګي اېښودل شوي دي. نوموړي زیاته کړه، چې د کرنې وزارت په تېرو دوو کلونو کې د کرنې او مالدارۍ سیستم د عصري کولو په موخه د دوی له لوري ګړندۍ هڅې روانې دی. په همدې حال کې د کابل ښاروالۍ د سمسورتيا او زرغونو سيمو د ساتنې رییس عبدالوکيل متوکل وویل چې ۲ ميليونه نيالګي توليد لري او په روان کال کې به د کابل ښار په بېلا بېلو برخو کې کېنول شي. چارواکو د نیالګیو اېښودلو د سږني کمپاین د پیل په مراسمو کې له هېوادوالو څخه هم غوښټنه وکړه، چې نیالګي کېنوي او د پالنې او ساتنې په برخه کې یې له حکومت سره همکار پاتې شي.
