د هلمند ولایتي چارواکي وايي چې د دغه ولایت په باغران ولسوالي کې یې ۱۵ هغه کسان د چورلکې له لارې روغتون ته رسولي چې د یخنۍ له امله ناروغان شوي وو. د باغران ولسوال جمعه ګل قریشي ویلي، یاد کسان د دې ولسوالي په لرېپرته «پشت جویې النجي» کلي کي د سړې هوا له امله ناروغان شوي وو او روغتون ته د لېږد ټولې لارې د واورې اورښت تړلې وې. هغه زیاته کړې چې پرون یې د چورلکې په مرسته یادې سیمې ته د ژغورنې یوه ډله لېږدول شوې وه چې ۱۵ ناروغان یې د باغران مرکز ته انتقال کړي چې پهکې ښځې او ماشومان هم ګډون لري. د باغران ولسوال جمعه ګل قریشي ویلي چې کلي کې پاتې کسانو ته یې اووړه، غوړي او نور خوراکي توکي هم لېږدولي او ناروغان تر درملنې لاندې دي. د ډاکترانو په وینا، د ناروغانو روغتیایي وضعیت د ډاډ وړ دی.
