د سرپرست حکومت ویاند وايي چې د څېړنو پر بنسټ په افغانستان کې د انفلاسیون کچه منفي یوه ته راټیټه شوې ده. نوموړي پر خپله ټوېټر پاڼه لیکلي چې په افغانستان کې د توکو بیې له ډېریو پرمختللو هېوادونو ټيټې دي. ورته مهال د اقتصاد وزارت له کورني تولیداتو ملاتړ او د بهرنیو اسعارو پر وړاندې د افغانیو ارزښت ساتل هغه لاملونه ګڼي چې له امله یې په هېواد کې د انفلاسیون نرخ راټيټ شوی دی. له دې سره هممهاله د ریاست الوزرا سرپرست بیا ډاډ ورکوي چې په نږدې راتلونکې کې به افغانستان د خوراکي توکو د تولید په برخه کې پر ځان بسیا شي. تر دې مخکې، نړۍوال بانک په یوه راپور کې ويلي، د افغانستان اقتصاد د نړۍوالو په مرستو سره ثابت پاتې دی او تمه ده چې په راتلونکو دوو کلونو کې به تولیدي برخه لاپسې براخه شي.
