په قطر کې د افغانستان د سرپرست حکومت د سیاسي دفتر رییس وايي، چې دغه دفتر د نړۍ له خوا د سرپرست حکومت د رسمیت پېژندلو لپاره هڅې کوي. نوموړی زیاتوي چې دغه دفتر له نورو هېوادونو سره د ا.ا د اړیکو ټینګښت، افغانستان ته د بشري مرستو راجلبولو او په دغه هېواد کې د پراختیايي پروژو بیا پېل لپاره خپلو هڅو ته دوام ورکوي. د قطر په پلازمېنه دوحه کې د سرپرست حکومت سیاسي دفتر د ۱۳۹۲هجري لمریز کال د غبرګولي په ۲۷ مه نېټه پرانیستل شو او هغه مهال يې موخه د سولې خبرې او د افغانستان د ستونزې سولهییز حل و او د سرپرست حکومت د چارواکو په خبره، اوس دا دفتر د افغانستان او نړۍوالې ټولنې ترمنځ د پله په حیث کار کوي.
