د هند حکومت پرېکړه کړې چې افغانستان ته شل زره ټنه نور غنم د ایران د چابهار بندر له لارې ولېږي. هندي رسنیو د هغه هېواد د چارواکو په حواله ویلي، د دغو شل زرو ټنو غنمو لومړنۍ محموله چې دوه نیم زره ټنه دي، د همدې اونۍ تر پایه هرات ولایت ته رسېږي. هند له افغانستان سره د دغو مرستو هدف د بشري ناورین د مخنیوي هڅه بللې ده. د راپورونو له مخې هند تر دې مخکې هم ۴۰ زره ټنه غنم د پاکستان د ځمکنیو بندرونو له لارې افغانستان ته لېږلي دي.
