د ملګرو ملتونو د بشري چارو د همغږۍ اداره اوچا وایي، روان ۲۰۲۳ کال کې ټول د بشري چارو شریکان هڅه کوي، په کمه شوې بودیجې سره په افغانستان کې ۲۲.۳ ميلیون وګړو ته مرستې ورسوي.د اوچا د افغانستان څانګې په یوه ټویټ کې ویلي، چې افغانستان د نړۍ یو له تر ټولو ناوړه بحران سره مخامخ دی او دمګړۍ په افغانستان کې څه باندې ۱۵ مېلیونه کسان د خوړو له شدېدې نا امنۍ سره مخ دي او له دې منځه بیا ۲ اعشاریه ۸ مېلیون کسان یې بېړنیو خوراکي مرستو ته اړتیا لري.د ملګرو ملتونو دې ادارې د کمې شوې بودیجې اندازه ۳،۲ ميلیارډ ډالره ښودلې، حال دا چې مخکې یې روان کال په افغانستان کې د بشري چارو لپاره د څه باندې ۴،۶ ميلیارد ډالرو غوښتنه کړې وه.
