د ژغورنې نړیوالې کمېټې ویلي چې په نادولتي موسسو کې د ط البانو له خوا دښځو د کار د منع کولو په پرېکړه خپه او ناخوښ دي. د ژغورنې نړیواله کمېټه له ۱۹۸۸ کال راهیسې په افغانستان کې فعالیت کوي او نن سبا په افغانستان کې څه دپاسه ۸۰۰۰ کارکوونکي لري چې له دې جملې څخه ۳۰۰۰ یې ښځینه کارکوونکې دي. دغه کمېټه په داسې حال کې په افغانستان کې د خپل فعالیت د بندولو خبر ورکوي چې د افغانستان بشري وضعیت د ناورین حالت ته رسېدلی او میلیونونه افغانان د بهرنیو خیریه موسسو مرستو ته اړتیا لري. دغه موسسه وایي نارینه او ښځینه کارکونکي یې د کلیوالي او ښاري ټولنو سره نږدې کارکوي ترڅو اړتیاوې وپیژني، ډیزاین او پروګرامونه د کلتوري حساسیتونو او ټولنیزو نورمونو سره سم پلي کړي. په همدې حال کې د بې پولې ډاکټرانو سازمان چې له تېرو ۴۰ کلونو راهیسې د ښځینه کارکوونکو په مرسته په افغانستان کې د روغتیا په برخه کې میلیونونه کسانو ته خدمات وړاندې کوي، ویلي چې له ښځینه کارکوونکو پرته به روغتیايي خدمتونه نه وي.
