د ملګرو ملتونو عمومي سرمنشي وايي، په نادولتي موسسو کې به د ښځو په کار بندیز د دې سازمانونو چارو ته زیان ورسوي. انتوني ګوترېش وايي، داسې مهال چې افغانانو خورا ډېرو بشري مرستو ته اړتیا لري، په افغانستان کې له نادولتي موسسو سره د نجونو او ښځو په کار بندیز به، په افغانانو د لا زیاتې سختۍ لامل شي. د ملګرو ملتونو سازمان لهخوا خپره شوې خبرپاڼه کې د ګوترېش له قوله، د ا.ا په دې پرېکړه خواشیني ښودل شوې او کار د ښځو حق ګڼل شوی دی. نوموړی وايي، دا سازمان او شریکان یې د نورو ملي او نړیوالو نادولتي موسساتو په ګډون، له ۲۸ میلیونه زیاتو افغانانو سره چې د ژوندي پاتې کېدو لپاره مرستو ته اړتیا لري، مرسته کوي. خو ګوترېش د دې چارو د لا ښه سمون لپاره او بې له ځنډه او په خوندي توکه د دې خلکو د لاسنیوي لپاره د نجونو او ښځو فعالیت مهم بللی.
