د بلوچستان او سویلي وزیرستان په بېلا بېلو امنیتي پېښو کې د پاکستان د څلورو سرتېرو په ګډون اوه کسان وژل شوي دي. د بلوچستان ځایي چارواکي وایي چې په کیچ ولسوالۍ کې د ډنوک او ګوګدان په منځنۍ سیمه کې وسله والو کسانو د امنیتي ځواکونو پر کاروان برید کړی دی. سرچینې زیاته کړې چې په دې برید کې د یوه افسر په ګډون څلور سرتیري وژل شوي او یو بل ټپي شوی دی. امنیتي مسوولینو ویلي چې په سیمه کې چاڼیز عملیات پیل شوي، خو تر اوسه د پېښې په تړاو نه څوک نیول شوي او نه هم چا ددې برید مسوولیت اخیستی دی. خو تر دې مخکې د دا ډول بریدونو مسوولیت د بلوڅانو د ازادۍ غوښتونکې ډلې اخیست. د یو بل خبر له مخې، د ډیورنډ فرضي کرښې ته څېرمه د خیبر پښتونخوا د سویلي وزیرستان په برمل سیمه کې د یوې کورنۍ درې غړي وژل شوي دي. ځایي سرچینو رسنیو ته ویلي چې دوی وړمه ورځ د نامعلومو کسانو لخوا تښتول شوي وو او پرون یې مړي ترلاسه شوي دي.
