د اوکراین ولسمشر ولودیمر زېلېنسکي له خپل امریکايي سیال جوبایډن سره په سپینه ماڼۍ کې کتلي دي. دا په فبرورۍ کې پر اوکرایین د روسیې له برید وروسته لومړی ځل دی، چې زېلېنسکي له هېواده بهر سفر کوي. په سپینه ماڼۍ کې د زېلېنسکي له هرکلي کولو وروسته بایډن ژمنه وکړه، چې د پرمختللي پاټریاټ هوايي دفاعي سیسټم په ګډون به له اوکرایین سره د دفاع پیاوړي کولو په برخه کې مرستې روانې وساتي. تر لیدنې وروسته بایډن په یوه ګډ خبري کنفرانس کې وویل، چې امریکا او اوکرایین باید په ۲۰۲۳ کال کې هم د یوه بل تر څنګ ودرېږي. ولسمشر زېلېنسکي بیا ګډې خبري غونډې ته ویلي، واشنګټن ته د دې لپاره ورغلی، چې د امریکا د ولسمشر او خلکو مننه وکړي، چې د دوی ملاتړ کوي.
