د ریاست الوزراء اداري مرستيال وايي نړیوال او د سیمې هېوادونه دې په هېواد کې د پراختیایي پروژو مخنیوی نه کوي څو خلکو ته د کار زمینه برابره او کډوالۍ ته اړ نه شي. دغه څرګندونې د ریاست الوزرا اداري مرستيال په کابل کې د کډوالۍ نړۍوالې ورځې په مناسبت جوړې شوې غونډه کې وکړې. هغه زياته کړه چې په افغانستان کې د زيربناوو له منځه تلو او تحميلي جګړو خلک له اقتصادي ستونزو سره مخ کړي دي. دی وايي چې له افغانانو سره یوازې بشري مرستي كول كافي نه دي او په وينا یې نړیوال او د سیمې هېوادونه دې په افغانستان کې د پراختيايي پروژو مخنیوې نه کوي. د ده په خبره، ټول هېوادونه دې په هېواد کې د ټاپي کاسا زر، رېل پټلۍ او داسې نورو پروژو په پیلولو کې همکاري وکړي. هغه له ټولو هېوادونو غوښتنه وکړه چې له افغانستان سره دې په داخلي بېځایه شوو او بهرنیو کډوالو ستنېدو کې مرستې وکړي او دوی ته دې د ژوند اسانتیاوي برابري كړي.
