د سعودي عربستان په جده ښار کې د اسلامي هیوادونو د مشورتي ډلې په نهمه کلنۍ غونډه کې په افغانستان او پاکستان کې د پولیو ناروغۍ د مخنیوي په څرنګوالي بحث وشو. د سعودي عربستان په جده ښار کې د اسلامي هیوادونو د مشورتي ډلې په نهمه کلنۍ ناسته کې د ا.ا د سرپرست حکومت د عامې روغتیا وزارت په استازیتوب د پولیو د له منځه وړلو د بېړني عملیاتي مرکز مسوول، ډاکټر نېک ولي شاه مومن او د ماشومانو لپاره د ملګرو ملتونو د مالي صندوق یا یونیسف ادارې د افغانستان د دفتر استازو ګډون کړی ؤ. د یونیسف ادارې د عامه اړیکو مسؤول، سید کمال شاه وویل د اسلامي هیوادونو د مشورتي ډلې او د دیني عالمانو په مرسته او همکارۍ به په افغانستان او پاکستان کې د پولیو ناروغۍ د له منځه وړلو په تړاو د پام وړ ګامونه پورته شي او مثبتې پایلې به له ځانه سره ولري. د یادونې وړه ده چې د اسلامي هیوادونو د مشورتي ډلې په نهمه کلنې ناسته کې چې درې ورځې یې دوام وکړ، د کعبه شریف امام، د اسلامي همکاریو سازمان او ځینو نورو مسؤولینو ګډون کړی ؤ.
