د امریکا د بهرنیو چارو وزیر انتوني بلېنکن وايي چې د ازبکستان د بهرنیو چارو وزیر ولادیمیر نوروف چې امریکا ته یې سفر کړی، د بېلابېلو مسایلو په ځانګړې توګه په افغانستان پورې د اړوندو مسایلو په هکله به ورسره خبرې اترې وکړي. دا سفر له هغه وروسته ترسره کېږي چې په دې وروستیو کې د افغانستان په هکله د سیمې او نړۍ هېوادونو اندېښنې زیاتې شوې دي. ټاکل شوې چې د ازبکستان دغه چارواکی به په خپل درې ورځني سفر کې له ځینو امریکايي چارواکو سره لیده کاته او خبرې اترې وکړي. د ازبکستان د بهرنیو چارو وزیر دغه سفر په داسې حال کې کوي، چې نن د امریکا او ازبکستان ترمنځ د ستراتېژیک مشارکت د خبرو دویمه غونډه جوړېږي او د افغانستان موضوع به د دې غونډې له مهمو مسایلو وي.
