بهرنیو چارو وزارت په کندهار کې د ډېورنډ پر فرضي کرښې د وړمې ورځې نښتې په غبرګون کې ویلي، چې د پاکستان حکومت دې د داسې پاروونکو کړنو مخنیوی وکړي چې د دواړو هېوادونو پر اړیکو منفي اغېز کوي، خو د پاکستان لومړی وزیر بیا د افغانستان له حکومته دا ډول پېښو د نه تکرار ډاډ غوښتی دی. د بهرنیو چارو وزارت ویاند په خپل ټويټر لیکلي، وړمه ورځ د افغانستان او پاکستان ترمنځ د سپين بولدک- چمن د تګ راتګ پر لاره خواشینوونکې پېښه رامنځته شوه چې دواړو خواوو ته یې مرګژوبله هم واړوله. دغې پېښې ته په غبرګون کې د پاکستان لومړي وزیر شهباز شریف پر خپلې ټوېټرپاڼې لیکلي چې دغه پېښه د خواشینۍ او غندنې وړ ده.
