د کډوالۍ نړیواله اداره وايي چې له څه باندې یو کال راهیسي، ۲۴.۴ میلیونه افغان وګړي، چې ددغه هېواد ټول نفوس ۵۹ سلنه جوړوي د خپل ورځني ژوند لپاره پر نړیوالو او بېړنیو مرستو تکیه کوي. دغه اداره وایي، د لومړنيو خدماتو وړاندې کول سخت اغېزمن شوي او پرمختيايي پروګرامونه ځنډول شوي دي. د کډوالۍ نړیوال سازمان مسوولین وايي، د ۲۰۲۱ کال له اګست میاشتې راهیسې، چې ا.ا واک ترلاسه کړی، نږدې ټول افغانان په بې وزلۍ کې ډوب دي. دغه اداره وايي، د افغانستان په ټولو ۳۴ ولایتونو کې خلک بېړنیو مرستو ته اړتیا لري او پرلپسې اقتصادي او چاپېریالي ټکانونه، عایداتو کې د پام وړ کمښت، د پیسو د لېږد رالېږد د لږوالي، د خوراکي او نورو توکو د بیو د لوړېدو لامل شوي دي. د کډوالۍ نړیوال سازمان مسوولینو په خبره، دوی په تېرو ۱۲ میاشتو کې له ۱،۳ میلیونه اغېزمن شویو افغانانو سره د خوراکي توکو، موقتي سرپناه، اوبو، روغتیا، او نورو اړینو توکو برخه کې مرسته کړې ده.
