د افغانستان پخواني ولسمشر حامد کرزي د نجونو پر مخ د پوهنتونونو، ښوونځیو او تحصیلي مرکزونو د تړلو او د میرمنو د کار په تړاو د ملگرو ملتونو د امنیت شورا د موقف هرکلی کړی دی. حامد کرزي په یوه خپره کړې اعلامیه کې پر سرپرست حکومت غږ کړی، چې د هېواد د پرمختگ، ودې او د حیاتي گټو د تامین لپاره هرڅومره ژر چې کېدای شي د نجونو د تعلیمي او تحصیلي بنسټونو دروازې دې پرانیستل شي. نوموړي دغه راز د اقتصادي ستونزو د حل او د کورنیو د ژوند د پرمختګ او ښه کېدو په موخه، له سرپرست حکومت غوښتي، چې د میرمنو د کار په مسئله کې پر خپله پریکړه له سره غور وکړي او په هیواد کې ښځو ته د کار زمینه برابره کړي.
