د افغانستان سرپرست حکومت پوهنتونونو کې د نجونو پر زده کړې له بندېز سره هممهاله دوه امریکایي وګړي چې له دوی سره بندیان وو، خوشې کړي دي. د امریکا غږ انګلیسي څانګې د بهرنیو چارو وزارت په حواله خبر ورکړی چې افغان سرپرست حکومت دغه بنديان د ښه نيت په موخه خوشي کړي دي. د امریکا د بهرنیو چارو وزارت ویاند نېډ پرایس په یوه خبري کنفرانس کې ويلي چې د ځينو ملحوظاتو له امله دمګړۍ د خوشې شويو امريکايي وګړو په اړه نور جزییات نه شي وركولى. د يادونې وړ ده چې څه موده مخکې د افغان سرپرست حکومت او امریکا ترمنځ د بندیانو تبادله شوې وه امریکا یو مشهور افغان سوداګر خوشې او کابل یو امریکايي وګړی خوشې کړی و.
