د روسیې د بهرنیو چارو وزارت خبرداری ورکړی که امریکا اوکراین ته د پیټریټ په نامه د هوايي دفاع پرمختللي میزایل انتقال کړي، مسکو به دا یو پاروونکی اقدام وګڼي چې عکس العمل ښودلو ته یې اړ کولی شي. د دغه وزارت ویاندې ماریا زخارووا ویلي چې د مسکو د هوايي بریدونو سره د مبارزې لپاره به د پیټریټ میزایلو انتقال د روسیې په لس میاشتنۍ جګړې کې د امریکا نقش نور هم قوي کوي چې ممکنه عواقب به له ځان سره ولري. هغې دا نه دي ویلي چې د روسیې غبرګون به څه وي، خو زیاته کړې يې ده چې واشنګټن باید د مسکو له خبرداري څخه سمه نتیجه ګېري وکړي او دا چې د امریکا له لوري د تجهیزاتو انتقالول د روسیې د بریدونو مشروع هدف دی. نوموړې وویل چې متحده ایالتونه وار دمخه په اغیزناک ډول د جګړې په یو اړخ بدل شوی دی.
