د کندهار ولایت مقام د یوې اعلامیې په خپرولو سره د امریکا سفارت د شارژدافیرې هغه څرګندونې وغندلې چې د بشري حقونو د فعالانو د هڅو د ملاتړ غوښتنه یې کړې وه. څو ورځې مخکې د افغانستان لپاره د امریکا شارژدافيرې مېرمن کرن ډېکر په څو ټویټري پيغامونو کې د کندهار ولایت له مشرانو غوښتي وو چې د بشري حقونو د فعالانو د هڅو ملاتړ وکړي. هغې په خپلو څرګندونو کې په ځانګړې ډول د کندهاري مشرانو یادونه کړې وه او له هغوی څخه یې غوښتي وو چې د افغانستان د بشري حقونو د فعالانو او نړیوالې ټولنې هڅې چې د ټولنیز عدالت، انساني کرامت او ازادیو لپاره یې کوي ملاتړ وکړي. خو د کندهار چارواکو بیا د مېرمن ډېکر څرګندونې د یوې اعلامیې په خپرولو سره غندلي او دا یې د افغانسان په کورنیو چارو کې لاسوهنه بللې ده. د کندهار ولایت مقام ویلي، د امریکايي ډیپلوماتې څرګندونې په کلکو ټکو غندي ځکه په اسلامي شریعت او ا.ا کې د بشر حقونو لپاره تر ټولو زیات درناوی شته.
