د امریکا او بریتانیا ځانګړي استازي هندوستان ته سفر کوي او د دغه هېواد له چارواکو سره د افغانستان پر وروستیو حالاتو خبري کوي. تر دې مخکې د امریکا د بهرنیو چارو وزارت اعلان کړی و چې د افغانستان لپاره ځانګړی استازی ټایم ویسټ د هندوستان جاپان او امارات په سفر روان شوی دى. هندي رسنيو خبر ورکړی چې د امریکا ځانګړی استازی ټام ويسټ به د دوشنبې په ورځ نوي ډيلي ته ورسیږي او له ځايي چارواکو سره به پر افغانستان خبرې کوي. سرچینې زیاته کړې چې هغه به د بهرنیو چارو په وزارت کې د افغانستان او پاکستان د څانګې له مسوول جي پي سینګ او د ملي امنيت د سلاکار مرستيال وبكرم مسري سره وګوري. هندي سرچینو ویلي چې هغه به له نوي ډيلي څخه نېغ په نېغه متحده عربي اماراتو ته ځي او د دغه هېواد له چارواکو سره پر افغانستان خبرې کوي. دا په داسې حال کې ده چې د افغانستان د سرپرست حکومت ددفاع وزیر ملا یعقوب هم پرون اماراتو ته لاړ او تر هغه مخکې پخواني ولسمشر حامد کرزی هم اماراتو ته رسېدلی دی.
