د بهرنیو چارو وزیر امیر خان متقي د پاکستان د بهرنیو چارو وزیر بلاول بوټو زرداري سره ټيليفوني خبرې کړي دي. د ا.ا د بهرنیو چارو وزارت وايي، چې په دې خبرو کې نوموړي په کابل کې د پاکستان پر سفارت ډزې وغندلې او ډاډ یې ورکړ چې د سفارت امنیت ته به ځانګړې پاملرنه کېږي او د پیښې د عاملینو د پیدا کېدو او د قانون منګلو ته په سپارلو کې به پوره هڅه وکړي. سرچينه زياتوي بوټو څرګنده کړه چې دغه ډول پېښې د دواړو هیوادونو ترمنځ اړیکې نشي خرابولی او هیچاته به اجازه ورنه کړي چې په داسې اعمالو کې کامیابه شي. نامعلومو وسله والو پرون په کابل کې د پاکستان پر سفارت ډزې وکړې او د لومړنیو معلوماتو له مخې، په دې پېښه کې یو تن ټپي شوی دی. د پاکستان صدراعظم شهباز شریف دا پېښه په کلکه غندلې ده.
