د ایران د بهرنیو چارو وزیر سیدعباس عراقچي په فرانسه کې د ایران د سایبري بریدونو په اړه د فرانسوي حکومت د ادعاوو په غبرګون کې، دغه هېواد د خپلو کورنیو چارو په مدیریت کې پر پاتې راتللو تورن کړی دی. عراقچي د نومبر پر ۱۰مه په خپله اېکس پاڼه لیکلي، چې فرانسه د خپلو کمزوریو د پټولو لپاره د خپلو ستونزو پړه پر نورو اچوي. نوموړي زیاته کړې، چې د فرانسې حکومت ان د اعتراضونو د سمبالولو او د کورنیو چارو د مدیریت وړتیا هم نه لري. د ایران د بهرنیو چارو وزیر د خپل هېواد ځواک ته په اشارې ویلي، چې ایران پیاوړی دی؛ خو د ده په وینا، د فرانسې په څېر خپل ځواک په غزه کې د وژنو د ملاتړ او پر ښوونځیو او روغتونونو د بمبارۍ لپاره نه کاروي.
