د خوست ولایت ځایي چارواکي وایي، د دغه ولایت په صنعتي پارک کې د نږدې ۱۰۰ تولیدي فابریکو د جوړولو چارې شاوخوا ۷۰ سلنه مخته تللې دي. د خوست والي مولوي عبدالرحمن حقاني د صنعت او سوداګرۍ له رییس مولوي بهایي جان بلال سره یوځای د سموات باغ په صنعتي پارک کې د یو شمېر فابریکو له روانو ساختماني چارو لیدنه کړې او د پروژو د پرمختګ بهیر یې ارزولی دی. د والي ویاند مستغفر ګربز رسنیو ته ویلي، چې والي د لیدنې پر مهال د فابریکو د جوړولو چارو پر چټکتیا، د ودانیز کیفیت پر ښهوالي او د ټاکل شویو معیارونو پر رعایت ټینګار کړی دی.
