اټکلونه ښيي چې له روسیې سره د جګړې د دوام په صورت کې به د اوکرایین پوځي لګښتونه په ۲۰۲۷ کال کې په ټولیز ډول نږدې ۱۷۳ میلیاردو ډالرو ته ورسېږي، چې د ورځې شاوخوا ۴۷۳ میلیونه ډالر کېږي. د ټاس خبري اژانس د اکټوبر پر ۲۵مه راپور ورکړی، چې دغه اټکل د اوکرایین د مالیې وزارت د راپورونو پر بنسټ شوی دی. په دې لګښتونو کې د فعالو سرتېرو معاشونه، د پوځي تجهیزاتو او مهماتو پېرود او د پوځ نورې اړینې اړتیاوې شاملې دي. خو د جګړې د پخوانیو سرتېرو او د وژل شویو پوځيانو د کورنیو د ټولنیز ملاتړ لګښتونه، د هغو دفاعي سنګرونو جوړول چې د دفاع وزارت یې مسوولیت نه لري، او نور دولتي لګښتونه په دې محاسبه کې نه دي شامل شوي.
