په افغانستان کې د ملګرو ملتونو پراختیايي پروګرام (یو اېن ډي پي) ویلي، چې پر لمریزې برېښنا د ۸۳۳ ښوونځیو او روغتیايي مرکزونو له سمبالولو وروسته، څه باندې ۸۱۲ زره ښځې او نجونې د دې پروژې له ګټو برخمنې شوې دي. دغه سازمان د نجونو د نړیوالې ورځې په مناسبت، د تلې په ۱۹مه، ویلي چې په دې پروژه کې ۴ زره او ۴۱۰ ښځینه ښوونکې او ۱ زره او ۶۰۷ ښځینه روغتیايي کارکوونکې هم له خدماتو برخمنې شوې دي. د یو اېن ډي پي په وینا، د دې پروژې له لارې ۲۰ ښځو ته د لمریزې برېښنا د سیسټمونو د نصب او کارولو روزنه هم ورکړل شوې ده. د دې پروژې موخه لمریزې انرژۍ ته د لاسرسي پراخول او په افغانستان کې د ښځو او نجونو لپاره د غوره فرصتونو برابرول دي.
