د افغانستان او ایران د خصوصي سکټورونو ترمنځ په کابل کې د سوداګریزو اړیکو د پراختیا په غونډه کې د ۴۵۱.۸ میلیونه ډالرو په ارزښت ۲۸ هوکړهلیکونه لاسلیک شوي دي. د افغانستان د سوداګرۍ او پانګونې خونې مسوولینو ټینګار کړی چې د دواړو هېوادونو اقتصادي همکاري باید له پېر او پلور هاخوا، د انرژۍ او ګډو پانګونو برخو ته هم وغځول شي. د ایران د سوداګرۍ خونې مرستیال قدیر قیافه ویلي، د مالي، بانکي او پولي راکړو ورکړو خنډونه د دواړو هېوادونو د سوداګریزو اړیکو پر وړاندې له مهمو ستونزو څخه دي. دغه غونډه د امام ابوحنیفه د پنځم ملي او نړیوال نندارتون په څنډه کې د ګډو پانګونو او اقتصادي همکاریو د پراختیا په موخه جوړه شوې وه.
