د سوداګرۍ او پانګونې خونې د سرطان د یوه تخصصي خیریه روغتون د جوړېدو طرحه تصویب کړې ده. د سوداګرۍ خونې د مسوولینو په خبره دغه روغتون به په لومړي پړاو کې ۱۰۰ بستره ولري او په ځانګړي ډول به د هغو بېوزلو سرطاني ناروغانو د تشخیص او درملنې لپاره کارول کېږي، چې د درملنې مالي توان نه لري. د خونې رئیس سیدکریم هاشمي ویلي، دا یوه ملي او بشري طرحه ده چې د سوداګرو، پانګهوالو، خیریه بنسټونو او خلکو په ګډون به عملي شي.د پروژې د پلي کولو لپاره یوه مسلکي کمېټه هم ټاکل شوې، څو د روغتون د جوړېدو ځای، نقشه، طبي وسایل، لګښتونه، مالي سرچینې او د مدیریت څرنګوالی وارزوي او د پروژې جامع اجرایي طرحه چمتو کړي.
