اروپايي ټولنې په افغانستان کې د خوړو د خوندیتوب او اقلیمي بدلونونو پر وړاندې د مبارزې لپاره ۱۵ میلیونه یورو ځانګړې کړې دي. اروپايي ټولنې ویلي، دغه مرسته د ملګرو ملتونو د خوړو له نړیوال پروګرام سره د همکارۍ په چوکاټ کې د افغانستان د اقلیمي مقاومت او د خوړو د سیستمونو د پیاوړتیا لپاره کارول کېږي. د دې مرستې له لارې به د سیمهییزو محصولاتو پر بنسټ د ښوونځیو د خوړو برابرول، د اقلیمي بدلونونو پر وړاندې د مقاومت لرونکو معیشتي فرصتونو رامنځته کول او د طبیعي سرچینو د دوامدار مدیریت ملاتړ وشي. اروپايي ټولنه وايي، د مرستې یوه برخه به د کرنې او خوراکي توکو په برخه کې د خصوصي سکټور د ونډې پیاوړتیا ته هم ځانګړې شي.
