د افغانستان د سوداګرۍ او پانګهونې خونې مشر، سید کریم هاشمي، د روسیې او قزاقستان له ګډ سوداګریز پلاوي سره د لیدنې پر مهال د سوداګریزو، اقتصادي او پانګهاچونې همکاریو د پراختیا په اړه خبرې کړې دي. هاشمي په دې لیدنه کې د افغانستان د کانونو، کرنې او صادراتي ظرفیتونو په اړه معلومات وړاندې کړل او د روسیې او قزاقستان پانګهوال یې وهڅول چې د کانونو، صنعتي تولید او پروسس په برخو کې پانګونه وکړي. هغه د دواړو خواوو ترمنځ د سوداګرۍ د پراختیا، سوداګرو ته د ویزو د اسانتیا، د سوداګرو ترمنځ د مخامخ غونډو او د همکاریو د هوکړهلیکونو د لاسلیک وړاندیز هم کړی. بلخوا، د روسیې د سوداګریز پلاوي استازو ویلي، چې د افغانستان د پانګهونې او سوداګرۍ فرصتونو ته د روسي سوداګرو لېوالتیا ډېره شوې او له سلو څخه زیات روسي سوداګر او پانګهوال غواړي افغانستان ته سفر وکړي او له افغان سوداګرو سره د ګډو همکاریو په اړه خبرې وکړي.
