د غزني ولایت ځایي چارواکي وایي، چې د مرکز اړوند د روضې کوتل په سیمه کې د کابل ـ کندهار پر لویه لاره د یوې ترافیکي پېښې له کبله لږ تر لږه ۲ کسان مړه او ۲۹ نور ټپیان شوي دي. د ځايي مسوولینو په وینا، پېښه تېره شپه شاوخوا ۱۰ بجې د یوه ۵۸۰ مسافر وړونکي او یوه بار وړونکي موټر د ټکر له امله رامنځته شوې ده. د غزني د امنیې قومندانۍ ویاند ابو خالد سرحدي ویلي، په ټپیانو کې ۱۱ ښځې هم شاملې دي او د ۸ کسانو روغتیايي وضعیت نازک ښودل شوی دی. نوموړي د پېښې اصلي لامل د موټر چلوونکو بېاحتیاطي بللې او ویلي یې دي چې د پېښې په اړه نورې څېړنې روانې دي.
