ازبکستان د افغانستان خلکو ته د ۳۲۰ ټنو بشري مرستو یوه نوې جوپه را لېږلې ده. د راپورونو له مخې، دغه مرستې د بلخ ولایت د حیرتان بندر له لارې ځایي چارواکو ته سپارل شوې دي. سرچینې ویلي، چې په دې مرسته کې اوړه، وریجې، غوړي او د کورنیو نور اړین توکي شامل دي. دا مرستې داسې مهال افغانستان ته رسېږي چې هېواد له پراخې بېوزلۍ او بشري ناورین سره مخ دی او میلیونونه کسان بیړنیو مرستو ته اړتیا لري. د یونیسف د راپور له مخې، په ۲۰۲۶ کال کې شاوخوا ۲۱.۹ میلیونه افغانان بشري مرستو ته اړتیا لري او میلیونونه ماشومان د خوړو د کمښت او خوارځواکۍ له ګواښ سره مخ دي.
