د چین په هانګژو ښار کې د افغانستان د کرکټ پلاوي او یو شمیر لوبغاړو په دغه هیواد کې له میشتو افغان محصلینو سره په ګډه د چین د کرکټ له لوبډلې سره یوه دوستانه لس اوریزه سیالۍ ترسره کړه. په دغه سیالۍ کې د افغان لوبغاړو له ډلې قیس احمد، ظاهر خان، فیصل شینوازاده، وحید ځدران او ۷ تنه نورو افغان محصلینو برخه اخیستې وه. په دې سیالۍ کې افغان لوري د چین لوبډلې ته په ټاکل شویو لسو اورونو کې ۸۸ منډې هدف ورکړ. په ځواب کې یې چیني لوبغاړي ونه توانیدل چې ټاکل شوی هدف ترلاسه کړي او لوبه یې ۲۴ منډو په توپیر بایلوده. د یادونې وړ ده، چې د دې سیالۍ پر مهال د افغان کرکټ پلاوي مشر نوروز منګل وویل، چې د دې سیالۍ څخه یې موخه له چیني لوبغاړو سره د تجربو شریکول وو. نوموړي هیله څرګنده کړه، چې په راتلونکې کې به د افغانستان او چین ترمنځ د کرکټ په برخه کې دوه اړخیزې همکارۍ زیاتې او پیاوړې شي.
