د راپورونو له مخې، د نایجریا په شمال ختیځ کې د بورنو ایالت په مرکز مایدوګوري کې د څو چاودنو له امله لږ تر لږه ۲۳ کسان وژل شوي او له ۱۰۰ زیات ټپیان شوي دي. الجزیرې راپور ورکړی چې چاودنې د مایدوګوري تدریسي روغتون او دوو سیمه ییزو بازارونو، پوسته خانې او د دوشنبې بازار ته نږدې شوې دي. امنیتي مسوولینو ویلي، لومړني معلومات ښيي چې چاودنې د “شکمنو ځانمرګو بریدګرو” لخوا ترسره شوي دي. تر اوسه هیڅ ډلې د بریدونو مسوولیت نه دی منلی.
