د ایران د پارلمان مشر محمد باقر قالیباف ویلي، جګړه به تر هغې دوام وکړي څو امریکا او اسراییل پرې پښېمانه شي. نوموړي پر خپله اېکس پاڼه لیکلي، چې د امریکا ولسمشر ډونالډ ټرمپ د اسراییلو د لومړي وزیر بنیامین نتنیاهو له لوري دوکه شوی او اوس هم د هغه تر اغېز لاندې عمل کوي. قالیباف زیاته کړې، چې ایران اوس د اسراییلو او امریکا ترمنځ هېڅ توپیر نه کوي او دواړه د جګړې اصلي لوري ګڼي. هغه ټینګار کړی، چې د ایران ځواکونه به د هېواد د امنیت او ملي حاکمیت د دفاع لپاره خپلو عملیاتو ته دوام ورکړي. نوموړي دا هم ویلي، چې هر هغه اقدام ته به قوي ځواب ورکړل شي چې د ایران پر ضد ترسره کېږي.
