په هیواد کې د ملګرو ملتونو د خوړو او کرنې سازمان (ایف اې او) خبر ورکړی، چې د مالي مرستو د ترلاسه کولو لپاره نوملیکنه پیل شوې ده. یاد سازمان زیاته کړې، چې د بیړني خوراکي خوندیتوب پروژې په چوکاټ کې به د کرنې په برخه کې فعالو کاروبارونو ته د تطبیقي بلاعوضو مرستو زمینه برابره کړي. دغه سازمان ټینګار کړی چې دا طرحه د نړیوال بانک په مالي ملاتړ او تر شپږ میلیونه ډالرو پورې، د کرنې په برخه کې فعالو کاروبارونو ته ځانګړې کېږي. ایف اې او، د دغو مالي مرستو موخه د کرنیزو کاروبارونو ملاتړ او د خوراکي خوندیتوب پیاوړتیا بللې ده. د یاد سازمان په خبره، د شرایط وړ غوښتونکي هغه شرکتونه او نوي جوړ شوي کاروبارونه دي چې د ښځو تر رهبرۍ لاندې فعالیت کوي او دغه راز واړه او منځني کرنیز کاروبارونه او د تولیدوونکو فعالې او باتجربه ډلې هم پکې شاملېږي.
